Технологияларды коммерцияландыру бойынша ғылыми-практикалық семинар

2026 жылғы 30 қыркүйекте Орал қаласында технологияларды коммерцияландыру бойынша ғылыми-практикалық семинар өтеді. Іс-шара DP23692207 «Батыс Қазақстан облысы жағдайында суармалы жерлерде жоғары ақуызды мал азықтық дақылдарды өсіру» жобасын іске асырудың практикалық нәтижелеріне арналады.

Іс-шараның мақсаты – жобаның нәтижелерін таныстыру, оларды өндіріске енгізу және коммерцияландыру мүмкіндіктерін талқылау, сондай-ақ ғылыми қауымдастық, ауыл шаруашылығы тауарын өндірушілер, бизнес өкілдері мен әлеуетті серіктестер арасындағы өзара ынтымақтастықты дамыту.

Семинар аясында жобаның технологиялық және өндірістік нәтижелері, Батыс Қазақстан облысы жағдайында соя өсіру тәжірибесі, қолданылатын технологиялық шешімдер мен жабдықтар таныстырылады. Сонымен қатар бизнес-модель, нарық, өнімді ілгерілету және жоба нәтижелерін одан әрі ауқымдау мәселелеріне ерекше назар аударылады.

Қатысушылар үшін технологияларды коммерцияландыру бойынша практикалық сессия, әзірлеушілер мен бизнес өкілдерінің ашық диалогы, сондай-ақ Жәңгір хан атындағы Батыс Қазақстан аграрлық-техникалық университеті мен жобаның бизнес-серіктесі – «Ақназар-Жайық» ЖШС-нің практикалық тәжірибесінің таныстырылымы өтеді.

Семинар тәжірибе алмасуға, ғылыми әзірлемелерді агроөнеркәсіптік өндіріске енгізу перспективаларын талқылауға және ғылым мен бизнес арасындағы ынтымақтастықтың алдағы бағыттарын айқындауға арналған тиімді алаң болмақ.

Күні: 2026 жылғы 30 қыркүйек

Уақыты: 09:00–18:00

Өтетін орны: Орал қаласы, Chechil мейрамханасы

Қатысушыларды тіркеу: 09:00–09:30

Ғылыми қауымдастық өкілдерін, агробизнес өкілдерін, ауыл шаруашылығы тауарын өндірушілерді, кәсіпкерлерді, жас ғалымдарды және ғылыми әзірлемелерді коммерцияландыруға қызығушылық танытқан барлық қатысушыларды семинарға қатысуға шақырамыз.